ब्रेकिंग

देश

अक्षतीर हवाई संरक्षक यंत्रणेला जगभरातून मागणी

Samruddhi Dhayagude
23 May 2025

डीआरडीओकडून स्पष्ट, ऑपरेशन सिंदूरमध्ये चमकदार कामगिरी

नागपूर : ऑपरेशन सिंदूरमध्ये भारतीय बनावटीच्या अक्षतीर हवाई संरक्षक यंत्रणेने मोलाची कामगिरी केली होती. चमकदार कामगिरी पाहून जगभरातून यंत्रणेला मागणी वाढत चालली आहे, अशी माहिती संरक्षण संशोधन आणि विकास संस्थेचे (डीआडीओ) प्रमुख समीर कामत यांनी शुक्रवारी दिली.

ऑपरेशन सिंदूरवेळी ९ दहशतवादी तळांना सैन्याने लक्ष्य केले होते. तेव्हा संपूर्णत: स्वयंचलित अक्षतीर हवाई संरक्षक यंत्रणा जागोजागी बसविली होती. त्यात यंत्रणेने चमकदार कामगिरी केली होती. त्यामुळे जागतिक पातळीवर यंत्रणेत रस वाढत असल्याचे कामत यांनी नागपूर दौर्‍यावेळी सांगितले. त्यांनी स्वदेशी ड्रोन, क्षेपणास्त्रे आणि रॉकेट निर्मिॅती ठिकाणांना या वेळी भेटी दिल्या.

आत्मनिर्भर भारत योजना अधिक साकारावी, यासाठी डिआरडीओ प्रयत्न करत आहे. त्यात आणखी भर घातली जाणार आहे. त्या माध्यमातून सैन्याला आधुनिक तंत्रज्ञान युक्त शस्त्रे मिळण्याचा मार्ग मोकळा होणार असल्याचे त्यांनी सांगितले.

अक्षतीर हवाई संरक्षक यंत्रणा आधुनिक आहे. शत्रूचे विमान, ड्रोन अथवा क्षेपणास्त्राचा वेध घेण्याचे सामर्थ्य त्यात आहे. रडार, सेन्सर आणि संपर्क यंत्रणेने युक्त अशी परिपूर्ण यंत्रणा आहे. या सर्व बाबी एकत्रित असून एका वाहनावर त्या बसविल्या आहेत. त्यामुळे ती यंत्रणा एका जागेवरुन दुसर्‍या जागेवर सहज हलविता येणारी आहे.